സ്വപ്ന ദംശനം

സ്വപ്നങ്ങളില്‍ നിറഞ്ഞത്‌

പതിവു രൂപകങ്ങള്‍ മാത്രം..

കണ്ണുകള്‍ മൂടിക്കെട്ടിയ ഞാന്‍ ,

തുരങ്കത്തില്‍ കൂടിയുള്ള യാത്ര,

ചരിഞ്ഞിറക്കങ്ങള്‍ ,

വലിഞ്ഞു കയറ്റങ്ങള്‍ ,

കനല്‍പ്പൊള്ളല്‍ ,

മുള്‍പ്പാതകള്‍ ,

പന്നിപ്പുളച്ചിലുകള്‍ ,

മൈഗ്രൈന്‍ വിങ്ങുന്ന

ആനയോട്ടങ്ങള്‍ ,

കൂമന്‍ മൂളലുകള്‍ ,

ഇറക്കി വിടപ്പെട്ട സ്ഥലമായിരുന്നു വിചിത്രം,

നാലോ എട്ടോ പതിനാറെന്നോ പിരിയുന്ന,

അനേകം കാലുകള്‍ വിരിച്ചു കിടക്കുന്ന

ജീവിയുടല്‍ പോലെ,

തലയില്ലാത്ത ജങ്ക്ഷന്‍ ,

നോക്കുമ്പോഴെല്ലാം

മിഴിക്കുന്ന ചുവപ്പന്‍ ഒറ്റക്കണ്ണ്

പോലീസുകാരന്റെ സ്റ്റോപ്പ്‌ ബോര്‍ഡിനപ്പുറം

നിറഞ്ഞ ശൂന്യത..

പിന്നിട്ടത് ഇരുള് വിഴുങ്ങിയ

കാട്ടുവഴി,

കാതില്‍ ,

ഏതോ ദിക്കില്‍ നിന്നും പുറപ്പെട്ട

തീവിഴുങ്ങിക്കാറ്റിന്റെ ഹൂങ്കാരം..

മുന്നില്‍ ,

തലയോട്ടിപ്പാത്രത്തില്‍

പിച്ചതെണ്ടുന്ന കുട്ടിയുടെ

പാട മൂടിയ കണ്‍വെളുപ്പ്‌

നീയെന്നെ ഇറക്കി വിട്ട

അതേയിടത്തില്‍ തന്നെ,

പച്ച മാത്രം കത്താത്ത സിഗ്നലില്‍

ദിശയറിയാതെ

ഞാന്‍ .....